Cambios na circulación pola estrada N-550 á altura do núcleo urbano de Barro a partir da semana entrante. Así o anunciou o Concello no seu perfil oficial nas redes sociais, no que se explica que pode haber retencións e alteracións desde o luns por mor do inicio duns traballos de mellora no cruce entre a estrada Areal e a estrada nacional.
O Ministerio de Transportes, Movilidad y Agenda Urbana (Mitma) formalizou o pasado mes de xuño, por un importe de 91.431,64 euros, o contrato de obras denominado Adecuación de intersección en San Antoniño. N-550. km 107,230 no núcleo urbano de Barro.
Con esta actuación a estrada mellora a súa sección transversal, xa que se disporán carrís centrais e se habilitará un lugar para realizar cambios de sentido, coa conseguinte mellora na seguridade viaria.
Esta intervención foi longamente demandada polos veciños e o Goberno local.