Moldes pedirá o apoio puntual de Silvia Díaz para tres mocións do próximo Pleno

Tres son as mocións coas que o PP de Poio acudirá ao Pleno de setembro, no que o portavoz, Ángel Moldes, cualificou como "un inicio de curso atípico, pois nós levamos a traballar desde o minuto cero despois das eleccións". Moldes levará un texto insistindo na petición para rebaixar o IBI en función da renda, ademais do texto xa rexeitado con anterioridade para instar o Concello a que asuma o remate do viario de Rabo de Porco, en Raxó, aproveitando as obras iniciadas pola Xunta na PO-308.

O terceiro asunto será a petición para que se emitan os plenos por Youtube. O 'popular', que recorda que a súa opción foi a máis votada en todas as parroquias, adianta que quere negociar o apoio puntual da edil Silvia Díaz (Avante) e subliña que esta é a ocasión "de que demostre se estaba para gobernar de palabra ou facendo política cos feitos".