O mosteiro de Poio acolle este venres, ás 19.30 horas, un novo evento do programa Música no ar, no que o quinteto de metais da Orquestra Filharmónica de Pontevedra interpretará obras de diferentes épocas.
En concreto, o programa do evento conta con pezas de compositores como J. P. Sousa, J. Offenbach, Brahms, Rossino ou S. Joplin. A cita desenvolverase respectando protocolos de seguridade, hixiene e distanciamento ante a crise sanitaria xerada pola pandemia do coronavirus, polo que os asistentes deberán usar máscara de xeito obrigatorio e os accesos e a capacidade estarán controlados.
Música no ar, enmarcado dentro do programa cultural deseñado pola Deputación de Pontevedra para este ano, busca levar a cultura por toda a provincia, divulgar a música de cámara de xeito gratuíto e poñer en valor a todas aquelas persoas que se dedican a este xénero musical.
Esta semana terá lugar outra cita ao amparo deste programa. Será o domingo, día 16, cando a sección de percusión da Orquestra Clásica de Vigo protagonice un concerto, ás 20.00 horas, na carballeira de Caldas de Reis.
