A Policía Local de Poio tramita dilixencias a un mozo poiense de 22 anos como presunto responsable dun delito de danos a bens públicos, tras ser cazado in fraganti facendo unha pintada no parque Rosalía de Castro.
O mozo foi sorprendido por unha patrulla da Policía Local de Poio, cando pintaba un grafiti "de considerables dimensións" nun muro das escalinatas do parque, despois de que unha testemuña directa dese a alerta.
Tras identificar ao autor da pintada, interviñéronselle cinco sprays que levaba nunha mochila, momento no que os axentes puideron comprobar que a pintura estaba fresca e que o mozo tiña as mans manchadas da mesma cor. Aínda por riba, as letras pintadas na parede correspondían co seu nome. A pesar da existencia de numerosas testemuñas, o presunto autor das pintadas negou os feitos, tal e como informou a Policía Local.
Foi investigado por un presunto delito de danos e citado para a celebración dun xuízo inmediato que terá lugar a próxima semana. Tamén se abre a dobre vía, o penal, coa lei administrativa por infrinxir a Lei Orgánica 4/2015 sobre protección da Seguridade Cidadá.
Pódese enfrontar a unha multa de ata tres meses, localización permanente e traballos en beneficio da comunidade ata 30 días, ademais do pago dos gastos que xera a reposición do inmoble afectado ao seu estado orixinal.
Segundo explicaron os axentes, ao mozo ofrecéuselle tamén a posibilidade de buscar unha localización autorizada para realizar grafitis e "potenciar o seu talento, evitando estas situacións", algo que, segundo informaron, o mozo rexeitou.
En marzo de 2019 a Policía Local de Poio identificou tamén no parque Rosalía de Castro a varios menores realizando pintadas, unha práctica recorrente neste espazo. Nesta ocasión, deuse conta a Fiscalía de menores, repondo posteriormente a pintura da parede afectada no espazo público.
