A máis de dous meses vista da súa celebración, a Concellería de Turismo deu a coñecer este mércores os detalles da programación da Festa do Mar de Combarro, que vivirá a súa décima novena edición entre o 21 e o 25 de agosto na parroquia poiense. Concertos gratuítos, actividades para os máis pequenos, actuacións de música tradicional e outras moitas sorpresas serán algunhas das iniciativas que serán protagonistas durante eses días e que, segundo prevé o Concello, atraerán miles de persoas á contorna do recinto portuario e da Praza da Chousa, onde se desenvolverá boa parte destas citas.
Tal e como xa se anunciou hai uns meses, a programación musical contará con varios artistas de renome. Unha delas será a cantante chipriota Elini Foureira. Un dos seus temas máis coñecidos, Lume, valeulle para rozar a vitoria no Festival de Eurovisión de 2018, onde só quedou por detrás da intérprete israelí Netta. Ademais, tamén acudirán a Combarro o gaditano David de María, toda unha referencia no panorama nacional, o compositor dominicano Henry Méndez e o DJ Mark Deluxe. Así mesmo, volverá celebrarse o Festival Armadiña Rock e tamén actuará a orquestra Los Satélites.
Con respecto ao apartado culinario, o Concello confirma que a Mostra de Degustación Gastronómica contará "cunha ampla oferta dos mellores produtos da nosa ría, dos que se poderá gozar na carpa situada non Peirao da Canteira". O folclore e a música tradicional terán, así mesmo, a súa cota de protagonismo, grazas á Mostra da Canción Mariñeira. Entre o 23 e o 25 de agosto desenvolverase a XXIV Concentración de Embarcacións Tradicionais.
FESTA DA AMEIXA. Doutra banda, o departamento dirixido polo edil en funcións Xosé Luís Martínez informa de que a Festa da Ameixa de Campelo, que alcanza os 31 anos de existencia, terá lugar do 13 ao 15 de setembro. Coti, Roi Casal e a orquestra Gran Parada ofrecerán concertos gratuítos na Praza da Granxa, onde tamén se celebrará o Desembarco Pirata para os máis pequenos. Non faltará tampouco a tradicional homenaxe aos mariscadores e mariscadores da pié e á boia das tres confradías da ría de Pontevedra xubilados durante os últimos meses.
