Avante Poio, BNG e PSOE parecen dispostos a entenderse antes do 15 de xuño. Os responsables das tres formacións que aspiran a formar unha coalición de esquerdas para garantir un Goberno local estable coincidiron este mércores á hora de valorar positivamente a primeira reunión de traballo mantida o pasado martes e que se repite este xoves coa intención de concretar máis aspectos relacionados coa repartición de áreas e a mellora da xestión da Administración local.
O alcalde en funcións, Luciano Sobral, destacou que "os nosos programas coinciden en moitos aspectos" e mostrouse de acordo en buscar fórmulas que sirvan para lograr, en palabras de Silvia Díaz, "a rexeneración do Concello e a finalización da inercia que se viña dando nos últimos anos". Neste sentido, os representantes de Avante ofreceron a nacionalistas e socialistas un documento coas súas condicións, que, de momento, céntranse en obter "melloras efectivas do funcionamento do Concello e do Goberno local". A partir de aí, comezarán a tratarse cuestións máis concretas, como a distribución de concellerías ou a priorización das actuacións que figuran nos seus respectivos programas electorais.
As tres partes destacan a boa sintonía mostrada nesta primeira reunión. Neste sentido, aínda que a negociación probablemente se estenderá durante varios días, Díaz mostrouse convencida de que se chegará a un acordo antes da investidura, fixada para o 15 de xuño. Pola súa banda, nacionalistas e socialistas destacan o achegamento de posturas, mentres que o Partido Popular, cuarto en discordia nesta partida de xadrez, esixe que a negociación sexa "transparente".
