Un comercio de Ponte Caldelas acaba de materializar a primeira doazón económica do ano para as familias en situación de vulnerabilidade do Concello. Trátase da tenda de roupa Viste ben, situada no centro da vila, que se comprometera doar o 10% das vendas para as familias necesitadas.
A responsable da firma acudiu este venres ao Concello, onde foi recibida polo alcalde, Andrés Díaz, que encomiou o seu labor.
O rexedor destacou no seu perfil oficial nas redes sociais o xesto solidario desta comerciante, desenvolvido nun ano de especial dureza e que, ademais de xerar unha cantidade importante que será un apoio para as familias con necesidades de axuda, tamén contribuirá a dinamizar o comercio local, posto que se decidiu que a cantidade se destinará a produtos frescos do Mercado de Abastos. Tal e como apuntou o alcalde, os postos Frutería Mila Piñeiro, Pescadería Silmar, Carnicería Cándido e Carnicería Jesús Muíños contarán con 150 euros cada un para que os beneficiarios vaian facendo as compras que sexan necesarias.
O xesto da comerciante foi moi aplaudido pola Alcaldía, pero tamén polo resto dos veciños de Ponte Caldelas, municipio onde no peche do 2020 se sucederon varias iniciativas solidarias como a doazón de alimentos, como a posta en marcha polos Coribantes coa súa fetival Quilo; a recolleita iniciada pola asociación O Torreiro de Forzáns que culminou cunha doazón ao comedor de San Francisco e outra a Cáritas Ponte Caldelas; ou a iniciativa posta en marcha polos comerciantes da Praza de Abastos, que xusto antes de Nadal fixeron unha achega solidaria de alimentos que se repartiron entre os usuarios de Servizos Sociais que o demandaron para a realización de menús desas datas.
