Mobilización de obras en Vilaboa para a posta a piques de varios equipamentos municipais. O alcalde, César Poza, anunciou a licitación de dúas obras que se iniciarán en poucas semanas e que son resposta a demandas longamente realizadas por veciños e colectivos vilaboeses.
A primeira obra adxudicada é unha actuación no exterior do pavillón polideportivo do Toural para resolver os problemas de illamento desta instalación deportiva. A intervención está orzada en 63.000 euros.
Tal e como apunta o Concello, o pavillón polideportivo do Toural foi construído en 1993 e, a pesar de ser obxecto de diferentes actuacións de mantemento, acusa problemas constantes de filtracións e humidades que dificultan un adecuado desenvolvemento da actividade deportiva.
A actuación que se comezará a acometer en breve inclúe a instalación dun tabique pluvial sobre a fachada Sur da edificación principal, que acolle a pista deportiva e as bancadas. A nova protección estará formada por placas de aceiro galvanizado sobre rastreles metálicos.
A obra contempla tamén a retirada dos actuais canlóns de recollida de augas pluviais nas fachadas Norte e Sur para ser substituídos, do mesmo xeito que as bajantes.
Ademais, reporanse chapas danadas na cuberta, limparanse todos as fachadas mediante a aplicación de chorreo de auga a presión como paso previo á impermeabilización das mesmas. A segunda obra adxudicada polo equipo que lidera César Poza destinará 140.000 euros para a pavimentación e mellora da seguridade viaria en varias estradas nos lugares de Croas, Paredes e Uveiras.
Trátase dunha actuación que non só mellorará a capa de rodaxe das vías, senón que actualizará a sinalización horizontal reforzando o seu pintado e incluirá medidas de protección para os peóns.
