Unha gran tirolina pasará sobre a piscina da casa de Thiago e Salma, en Bértola, e rematará no barco pirata que ambos construíron nunha árbore do xardín durante o confinamento de marzo. Un trineo feito a man servirá para que Papá Noel leve os agasallos o 24 de decembro a este punto e non entre en casa. é o método que elixiron os nenos, con axuda do seu pai, Celso Galán, para que Papá Noel non teña que entrar a compartir espazo con non convivientes e saltarse as normas sanitarias.
Esta familia de Vilaboa decidiu prepararse para un Nadal distinto que xa vén precedida de prohibicións. "Non podemos ir a natación cos nenos, non podemos reunirnos, eu son bailarín e tampouco podo viaxar nin competir, e non poderemos ir a Vigo a ver as luces", explica Celso, que atopou na preparación dunha decoración especial para a súa casa o argumento perfecto para dar sentido ao parón deste mes.
Celso recoñece que isto da decoración e recreación non era inicialmente o seu. En realidade, ademais da súa afección, pola que foi campión de España de Baile Latino en 2018, a súa área laboral está vinculada coa automatización e o sector conserveiro. Isto das luces ao estilo Eurodisney (que enchen xa a casa e serán ence
ndidas este sábado con gran pompa) é algo que chegou en 2020. O ambiente completarano uns renos realizados con troncos e outros elementos de xardín. A idea prosperou e hai varios nenos no barrio que decidiron que as súas casas tamén atraian ao ancián do Ártico e aos seus renos: Hugo e Carla e Leire e Teo, que viven cerca, tamén adornaron as súas vivendas e esperan a ver o efecto desta gran decoración conxunta, que se inaugurará esta noite cun aceso oficial e incluso a tirada dalgún que outro lume de artificio.
