A Deputación de Pontevedra recibiu unha resposta da Alcaldía de París na que "agradece" e "toma nota" do ofrecemento da Escola de Cantería para participar na reconstrución de Notre Dáme. A iniciativa, que partiu dos antigos alumnos da escola, foi valorado polo goberno parisiense, que expresou que se volverá a pór en contacto coa institución provincial tras recompilar "unha maior información sobre a avaliación das necesidades existentes".
A Asociación de Canteiros de Poio ofreceu os seus servizos para a restauración da catedral parisiense tras o incendio e puxo como condición que o Goberno de España lles financie. O centro, que depende da Deputación, ten como finalidade "conservar e promocionar un dos oficios máis antigos e nobres de Galicia, o de cantería, para ensinar a arte de traballar a pedra". É unha escola única na península, dedicada á cantería ornamental e de construción, combinando ensinos teóricos e prácticos.
O escrito asinado pola delegada xeral de Relacións Internacionais do Concello de París, Patrizzianna Thiellay, en nome da alcaldesa, recolle que o ofrecemento pontevedrés "emocionou" o goberno local, que o agradece profundamente". A maiores, prosegue, é "un deber que un día esta xoia volva resplandecer no corazón da Cidade da Luz".