A Confraría de Pescadores de Pedra da Oliveira, en Vilaboa, confirmou este xoves que tamén pedirá o cesamento da actividade á Xunta, do mesmo xeito que o depósito de Arcade, pola mortaldade de ameixa na ría.
No caso das mariscadoras vilaboesas, un total de 65 traballadoras, os informes da asesoría técnica han confirmado un 69% da mortaldade. "Ao principio non parecía moito, pero foi en aumento, e pensamos que aínda pode seguir", indicou José González, portavoz do colectivo. A Patroa Maior, María del Carmen Cortegoso, confirmou que, "de momento, o que fixemos, aínda que non temos concedido o paro, foi non baixar aos lombos desde o 8 de febreiro porque a ameixa que está viva está débil e non é capaz nin de volver enterrarse na area ao extraela, polo que, descartamos, por agora, facer limpezas para retirar a ameixa que xa morreu". En canto ao tempo do paro "para ter amiexa nova onde se perdeu pode que fagan falla 18 meses, pero temos claro que é Mar quen decide canto poderemos parar", indica González, que estima que, polo menos, fará falta un semestre de traballo e espera para poder volver aos areais con garantías. A Confraría, do mesmo xeito que a de Arcade, debe decidir na súa Xunta Xeral o cesamento de actividade antes de completar a tramitación formal da petición de paro e as axudas necesarias.
