Xogos infantís e un concerto de Uxía e a Banda Molona foron os protagonistas do Día do Neno da Festa do Viño de Barro. Ao contrario que outros festexos, a Festa do Viño dedica o seu primeiro día sempre aos máis pequenos e nesta nova edición o formato repetiuse con xogos e inchables gratis para todos no Pavillón Municipal de Deportes e co concerto da afamada banda, que se celebrou baixo carpa en A Crega. A pesar de que, en consonancia co tempo en todas as Rías Baixas, non faltou a choiva nin os tronos, no interior da carpa o concerto desenvolveuse con normalidade e ante un público infantil desexoso de poder gozar da festa. O grupo Galifunk, que ía actuar na franxa horaria dos maiores, tivo que suspender a súa aparición por rexistrar algún positivo de covid-19, así que foi a formación Os Druídas a que asumiu este concerto.
A programación mantén para este venres os actos máis simbólicos de toda a festa, se exceptuamos a entrega de premios do concurso de viños. Trátase da lectura do pregón, a cargo do músico, mestre e animador de balcón Johnny Güimil, ás 21.00 horas, así como do concerto do seu grupo, Son das Tabernas. Tamén se inaugurará o Certame de Viños D. O Rías Baixas e haberá verbena, con Marbella e Los Satélites.
