O Concello de Poio acaba de publicar as bases, xerais e específicas do proceso de contratación de persoal laboral municipal, a través da Liña 3 do Plan Concellos da Deputación. Esta convocatoria está orientada á incorporación de 28 persoas, 15 das cales se integrarían en tarefas vinculadas á revalorización de espazos públicos urbanos e de protección ambiental.
Outra decena de empregados e empregadas pasarían a ser operarios na área de Obras e Servizos, aos que hai que sumar tres condutores e dous electricistas. Servizos Sociais, pola súa banda, contará con dous auxiliares de clínica, un posto de técnico de Xuventude e un traballador ou traballadora social, para garantir a realización de actividades e iniciativas que levan a cabo na Casa Rosada.
En Turismo, haberá dúas incorporacións de titulados Ciclo Superior, para reforzar unha área que cobra especial protagonismo durante a tempada estival.
Para rematar, as bases inclúen a contratación temporal de catro conserxes e tres persoas para labores de limpeza en dependencias municipais, como son a Casa Consistorial, o Centro Cultural Xaime Illa de Raxó ou a Casa Museo de Colón.
O investimento solicitado á institución provincial para poder levar a cabo esta actuación supera os 235.000 euros e a sede electrónica do Concello xa dispón dos documentos necesarios para coñecer as condicións de cada oferta, así como a titulación e requisitos necesarios.
Os e as interesadas en concorrer a esta oferta de emprego poderán realizar a solicitude a través da sede electrónica municipal ou presentala persoalmente no Rexistro do Concello, con cita previa. Os contratos terán duracións que oscilan entre os tres e os oito meses e parte deles asinaranse a finais de marzo.
