O Programa Axente Titor, coordinado pola Policía Local de Poio, adherirase ao plan específico desta área da Federación Española de Municipios e Provincias (FEMP).
A edil de Seguridade Cidadá, Marga Caldas, anunciou a intención de tripartito de reforzar o programa propio mediante esta adhesión, que deberá aprobarse nun pleno antes de ser oficial.
Tal e como apunta a edil, a FEMP conta cun protocolo específico para este tipo de programas, que se centran na protección ao menor
"O feito de integrarse nesta entidade non só axudaría a dar un maior púo a unha iniciativa pola que vimos apostando desde hai practicamente un lustro, senón porque tamén teriamos a posibilidade de optar a achegas que nos permitirían ampliar o seu campo de actuacións a novos eidos".
No ano 2017, o Concello de Poio pasou a ser un dos primeiros municipios de menos de 20.000 habitantes de España en contar con este servizo.
"Daquela, en Galicia moi poucos concellos o tiñan, á marxe de grandes urbes como A Coruña", recorda Marga Caldas, sinalando que outras áreas como a de Educación ou a de Servizos Sociais, coordínanse coa policía para mellorar o seu ámbito de actuación: a protección ao menor e a prevención na contorna escolar.
Desde a súa posta en marcha, o corpo de seguridade realizou preto dun centenar intervencións e actuacións. Os axentes titores, que son policías, pero gozan de formación específica para asumir este programa, teñen potestade para actuar no ámbito escolar sempre de face á resolución de posibles conflitos que poidan producirse nos centros.
Actuar en casos de absentismo escolar, a detección de menores que non están escolarizados, intervencións puntuais a petición dos propios centros para esclarecer feitos delituosos ou a vixilancia de posibles condutas de risco son algunhas das tarefas que se realizan a través deste programa.
