Axentes do Grupo de Investigación da Policía Autonómica de Pontevedra, en colaboración cos vixiantes da Confraría de San Telmo, comisaron 75 quilos de ameixa nun dispositivo contra a práctica do furtivismo en Poio, no que foron identificadas dúas persoas.
O control levou a cabo o pasado 16 de marzo, ante a problemática que o furtivismo está a ocasionar na zona, e deu como resultado a localización de dúas persoas, que resultaron ser reincidentes, ás que se comisaron os 75 quilos de ameixa e abríronselles dilixencias por un presunto delito contra a protección da flora e da fauna. As dilixencias remitíronse ao Xulgado de Garda e á Fiscalía de Pontevedra para a súa tramitación.
Aos investigados tamén se lles levantaron actas de presunta infracción por incumprimento do decreto que regula as normas sanitarias para a prevención do covid, xa que cando foron sorprendidos nin levaban a preceptiva máscara nin respectaban os horarios establecidos no toque de queda.
Os bivalvos foron pesados e cribados antes de ser devoltos ao mar, o que permitiu comprobar que máis da metade da ameixa comisada era de tamaño inferior á que se pode extraer de forma legal.
