A primeira tempada alta da zona de estacionamento de autocaravanas de Ponte Caldelas está a piques de concluír con éxito. Así o manifesta o Concello, que tras analizar os primeiros datos apunta a que nos fins de semana (de venres a luns) rexistráronse medias de ocupación do 75% das 40 prazas habilitadas. Entre semana, o nivel situouse cerca do 50%, aínda que, apuntan, "con días de maior afluencia de autocaravanas".
EUROPA. Entre a procedencia dos visitantes, detectouse unha maioría de viaxeiros nacionais, pero tamén familias procedentes de Portugal, Francia ou Alemaña. O recinto sitúase a escasos metros da Praia Fluvial da Calzada, nun punto no que o viario é xa semipeonil e foi controlado puntualmente pola Policía Local que, a pesar de detectar algunha incidencia, destaca o civismo dos usuarios, xa que non foi necesario impor ningunha sanción e demostraron gran respecto polo medio.
O alcalde, Andrés Díaz, considerou "moi positiva a repercusión económica deste tipo de turismo de calidade, que atrae familias que consomen na hostalería local e mercan no noso comercio". No espazo pódese permanecer un total de 72 horas e a limpeza de tanques realízase na zona de Chan da Barcia. Entre outras normas, non está permitido despregar avances, ou sacar mesas e cadeiras.