As autoridades penais detectaron que presos do cárcere da Lama comunicábanse co exterior a través do servizo de Teletexto, ao que accedían a través das televisións do centro.
A dirección da prisión ordenou o pasado mes de febreiro que se bloquease a función do Teletexto no cárcere por motivos "de seguridade".
Fíxoo tras pescudar que varios internos recibían mensaxes a través de páxinas abertas de citas, contactos ou anuncios do Teletexto, utilizando pseudónimos, palabras crave, páxinas e horas concretas, para evitar ser detectados.
Este sistema foi descuberto tras a queixa dun preso ao que lle quitaron a televisión durante tres días e, ao recuperar o aparello, tiña bloqueado o Teletexto e o menú do aparello.
Ante estas limitacións, o afectado presentou unha reclamación, desestimada en primeira instancia polo xulgado central de Vixilancia Penal.
A Audiencia Nacional ha confirmado, tras a apelación presentada pola avogada deste preso, que a decisión adoptada pola dirección do cárcere da Lama para bloquear o Teletexto está "xustificada".
Os maxistrados da Sala do Penal, no auto ao que tivo acceso Efe, conclúen que estas comunicacións "son un risco" para a seguridade do centro e do resto de poboación recluída ao eludir o control que dita a normativa penal a este respecto.
O auto ordena á prisión, en todo caso, restablecer as funcións básicas do menú do televisor, relativas á selección de canles ou os axustes de imaxe e son, xa que sen estas opcións o aparello "queda practicamente inutilizado".
