A Xunta de Galicia xa ten no seu haber as alegacións propostas pola Plataforma da PO-308 para tratar de mellorar o proxecto que se executará entre Fontenla, na parroquia de San Xoán, e Covelo, en Samieira. Varios integrantes do colectivo poiense fixeron entrega este mércores na Delegación Territorial, en Campolongo (Pontevedra), dos documentos, nos que achegan unha serie de suxestións para que se engadan á actuación prevista pola Consellería de Infraestruturas e Mobilidade. As obras contemplan a dotación de espazos específicos para peóns e ciclistas. Ademais, executarase unha tarefa a maiores para facilitar cambios de sentido e incorporacións á Comarcal desde vías secundarias.
Máis pasos para peóns, a recolocación dalgúns colectores de lixo ou a instalación de paradas de autobús en lugares seguros son algunhas das peticións que se inclúen entre as alegacións elaboradas pola plataforma, que, ademais, ten previsto enviar nos próximos días un escrito ao departamento autonómico para solicitar unha reunión cos seus dirixentes, co obxectivo de insistir na necesidade de que se habilite en Chancelas un paso para peóns de forma urxente. Trátase dunha solicitude histórica, tal e como recorda a portavoz da asociación, María Barcia. "Levamos pedindo o paso para peóns desde os anos 80. A primeira vítima mortal en accidente de tráfico nesa zona da PO-308 foi a finais dos 70. Por desgraza, ata o de agora nunca tiveron en conta a petición", lamenta.
ESCOLARES. Un dos argumentos que esgrime o colectivo de Poio á hora de defender a súa reclamación é que nesta zona son varios os menores que cada día deben cruzar a estrada para coller o bus escolar. Un feito que molesta á plataforma, segundo o seu portavoz, é que "ata o de agora nunca se nos explicaron as razóns polas cales o paso de peóns non se habilita neste punto. Parece mentira que non se execute esta medida nun tramo tan perigoso", sinala Barcia.Doutra banda, o colectivo tamén recorda que nun dos tramos da estrada, cuxa titularidade pertence á Xunta de Galicia, a velocidade está limitada a 70 quilómetros por hora nalgúns puntos de Chancelas, algo que os integrantes da plataforma consideran excesivo.
Para rematar, a agrupación ten previsto expoñer este venres publicamente o proxecto deseñado pola Consellería de Infraestruturas. Ademais, tamén dará a coñecer as alegacións presentadas. A cita é ás 12.00 horas na rúa Maceira, no centro de Combarro.
O motivo deste encontro era analizar a situación na que se atopa a conexión da nova vía do núcleo da parroquia coa rúa Leopoldo Nóvoa. A tira e afrouxa que manteñen a Xunta de Galicia e o Concello de Poio sobre esta obra preocupa ao colectivo, tal e como recoñeceu o presidente da Laxe, Cándido Dasilva. "É unha actuación clave para a localidade e vemos que, por unhas razóns ou outras, segue sen concluír", advertiu o dirixente.
Segundo explicou o propio presidente da agrupación local, Cores Tourís trasladoulles que a Consellería de Infraestruturas xa procedeu á expropiación de terreos e que agora a urbanización final do tramo corresponde á Administración local. No entanto, o Goberno local xa advertiu no seu momento de que esa vía non figura no PXOM, o que dificulta a actuación.
En todo caso, a asociación de veciños tamén solicitou manter unha reunión cos líderes dos tres grupos que forman o tripartito para abordar este tema.