Tras varios anos de ausencia, as Festas da Saleta volveron o pasado fin de semana a Raxó da mellor forma posible. Así o aseguran os organizadores da cita, que cifran en 18.000 o número de asistentes que tomaron parte nas diferentes actividades lúdicas e relixiosas que tiveron lugar entre o venres e o domingo.
Segundo explicou o presidente da Comisión de Festas do Raxó Club de Fútbol, Javier Ferreiro, unha das citas estrela foi a procesión marítima, que se desenvolveu durante a tarde do 22 de setembro. Trátase dun acto que levaba máis de medio século sen celebrarse na parroquia. Pola noite, o protagonismo recaeu na Orquestra Panorama, cuxo concerto congregou a máis de 8.000 fieis en pleno núcleo da localidade.
Outro momento emocionante tivo lugar o pasado domingo, coa homenaxe a deportistas con vínculos con Raxó.
Así, entregáronse uns recordos conmemorativos ao padeeiro Sergio Vallejo, bronce no Campionato de Europa de Piragüismo, cuxa familia paterna é orixinaria da parroquia. Idéntica homenaxe rendeuse ás regatistas Paula e Pomba González Esteban, campioas de España e do Mundo da clase Vaurien de vela, e que exercen de monitoras na Escola de Vela. Polo que respecta á Poxa de Ofrendas, nela tomaron parte máis de 30 persoas. A Comisión define como "éxito rotundo" o retorno das Festas da Saleta e confía en que se consoliden nos próximos anos.
Pola súa banda, a Asociación de Veciños A Laxe de Raxó expresou este luns o seu agradecemento, a través do seu presidente, Cándido Dasilva, ao Raxó Club de Fútbol "polo seu gran esforzo para organizar uns festexos que atraeron a un gran número de persoas á nosa localidade", concluíu.