A Concellería de Cultura de Poio deu xoves un golpe maestro na súa programación para o verán da pandemia ao lograr un cheo para a cata de viños que acolleu o Mosteiro de Poio e que, co denominador común de ofrecer 'Viños do Atlántico', amosou, da man do enólogo e produtor Roberto Regal, as bondades de varios caldos da IXP Ribeiras do Morrazo (a que acolle os terreos de Poio, Pontevedra, Marín os concellos do Sur, ata Rendondela) e das Terras do Barbanza.
A cita contou con 50 participantes e desenvolveuse no exterior do Mosteiro, aos pés do seu emblemático hórreo e foi seguida por un concerto da investigadora e cantante Faia Díaz, integrante de De Vacas. A cata foi descrita por Roberto Regal como unha cita particular "na que pode ser difícil expoñerlle ao participante o contexto destes viños, porque a IXP Ribeiras do Morrazo, por exemplo, é moi recente, e ten tamén albariño, sen ser da D.O., pero sinxela, no sentido de que moitos dos participantes son de Poio e das proximidades e queren entender ese contexto".
Regal destacou que os viños que se probaron "son difícis de conseguir no mercado, salvo en establecementos especializados, porque son todos de producións pequenas". Fronte á recencia de ambas indicacións xeográficas, o enólogo defendeu que "estes caldos teñen todos algo que os fai exclusivos, algo propio".
Destacou o feito de que Viñas do Mosteiro sexa un caldo elaborado pola orde mercedaria "que dalgún xeito ten que conservar algo de todo o legado e tradición adegueira do propio mosteiro desde o seu pasadio benedictino". Sinalou tamén a antigüidade de moitas das cepas de explotacións das que se extraen caldos como o de Areeiro, ou a presenza de "variedades ancestrais como a blanca lexítima dos viños do Barbanza" que se probaron xoves.
