A secretaria de Defensa avala á Illa de Tambo como referente en España

A secretaria de Estado de Defensa, Amparo Valcarce, visitou este luns Poio para facer unha visita á Illa de Tambo co obxectivo de estreitar lazos (tras a firma da concesión demanial do pasado 1 de marzo) e revisar que o Plan Director -xunto cos labores de preservación e limpeza da illa- van tal e como se acordaron.

Neste acto oficial déronlle a benvida o alcalde Luciano Sobral e o concelleiro de Urbanismo e Promoción Económica, Gregorio Agís na Casa Consistorial, acompañados polo equipo de Goberno local.

Previamente á visita á emblemática paraxe, a secretaria de Defesna destacou a importancia da unión "histórica" entre os militares e as forzas locais por un ben común: preservar a illa como un lugar natural no que se permitirá o uso, non militar, á Escola Naval de Marín co permiso do Concello de Poio, para acoller en Tambo aos futuros oficiais da Armada. Ademais, fixo fincapé no gran apoio do Goberno estatal para coidar dun lugar tan emblemático e representativo en Galicia ao que pór en valor.

Pola súa banda, o rexedor municipal expresou que "o convenio está a funcionar relativamente ben desde que o asinamos. Hai moitas visitas, pero controladas", precisou mentres recordaba a "gran responsabilidade" que ten o Concello de 17.000 habitantes. Ademais, destacou o compromiso de todas as partes para que Tambo poida ser "un referente". Sobral advertiu de que "queda moito traballo por facer" á vez que citou os traballos pendentes de recuperación e restauración dos elementos importantes desta porción de terra rodeada de auga.

INVERSIÓN. A comitiva destacou a relevancia do acordo demanial e o Plan Director, onde o Goberno estará "ao servizo dos cidadáns de Poio e o seu Concello para dar respaldo á conservación" e tamén "o seu mellor aproveitamento sendo respectuosos co equilibrio medioambiental para que a illa sexa coñecida en toda España". Ademais a secretaria de Estado de Defensa destacou a supervisión dos acordos coa Escola Naval de Marín, á que se dotará de dúas lanchas "que teñen un valor de 7 millóns de euros para a industria dos estaleiros Rodman de Galicia" e dar impulso ao emprego industrial na comunidade. Valcarce anunciou que se lle dará apoio á Escola Naval de Marín na formación dos oficiais da Armada, un impulso que se viu reforzado co convenio coa Universidade de Vigo.

Finalmente, a representante institucional revisou as labores de limpeza e valado para asegurar a preservación e visitar os lugares máis emblemáticos da illa.