As mostraxes periódicas que o Intecmar realiza nas augas da ría volveron a dar resultados altos pola presenza de toxina esta semana, polo que, desde o martes, decretouse o peche da Zona V ao marisqueo do montón.
A medida, que afecta a unhas 450 mariscadoras, supuxo a suspensión de tres das catro xornadas de traballo desta semana. Como se realizou unha proba que significou o peche cautelar, e unha segunda análise que confirma a alta presenza de toxina, o peche durará aínda uns días ata a seguinte mostraxe. Unha vez obtido o primeiro resultado positivo, aínda será necesaria unha segunda analítica antes de permitir que os e as traballadoras volvan ao mar. Así as cousas, é probable que estas probas se realicen a mediados da semana próxima.
As tres confrarías do fondo da ría poden dar por perdida a última semana do mes de febreiro. Na primeira de marzo non había fixadas datas de traballo e a actividade non se ía a retomar ata o 9 de marzo. Ata entón teñen a esperanza de que o mar recupere os seus niveis habituais de pureza.
En canto ao marisco retirado o martes, xornada en que se decretou o peche, tres dos compradores anunciaron onte que devolverán o produto: 1.020 quilos de ameixa japónica, un 40% do capturado o martes.
Ese prazo expira o luns e, se sucede como nos últimos anos, uns 30 barcos dos máis de 100 con permiso poderían estar a pensar en ir a por ameixa.
Na Zona V, onde dispoñen de tres bancos, non poderán, e falta saber se se manterá aberta a Zona IV, de momento, con resultados normais, pero pendente dunha nova mostraxe.