O Sergas alerta aos pais do CPI O Toural tras achar varios casos de paperas

Aínda que non hai unha incidencia de casos diagnosticados de paperas superior á de anos anteriores, como en 2016, a cantidade de rexistros de casos de paroiditis incrementouse nas últimas semanas, o que activou os avisos do Servizo de Epidemioloxía da área sanitaria de Pontevedra. é o caso do CPI O Toural, en Vilaboa, onde o centro exerceu de mediador coa comunidade escolar para facer chegar aos pais un aviso sobre a detección de casos de paroiditis na zona.

O aviso, difundido mediante o servizo Abalar entre os pais, explica que "ante a comunicación dalgún caso de paroidite entre os alumnos do CPI O Toural, infórmaselle de que no caso de que o seu fillo ou filla non padecera a enfermidade e non tivera postas as dúas doses da vacina tripla vírica incluída non calendario infantil de vacinacións, debe acudir ao centro de saúde co seu fillo ou filla".

O comunicado remite tamén ao centro de saúde aos menores que sospeiten que padecen a enfermidade, estean vacinados ou non. O principal síntoma das paperas é a inflamación das glándulas parótidas, situadas na parte posterior da mandíbula.

PREVIR

A enfermidade ten un período de incubación de 14-21 días, sendo máis contaxiosa uns catro días antes da inflamación visible das parótidas. Transmítese por contacto con gotitas de saliva no aire procedentes dun individuo infectado, de modo que se aconsella que as persoas que a padecen non acudan ao traballo, centro escolar ou actividades extraescolares, polo menos durante cinco días logo de padecer os síntomas iniciais.

Ademais da incidencia en casos de nenos ou adultos vacinados (debido ao descenso da efectividade da vacina co paso do tempo), é importante previr e evitar o contacto destes menores cos bebés que aínda non recibiron as dúas doses do triplo vírica (menores de 12 meses), polo que o Sergas recomenda a vacina nos casos de contacto directo con nenos ou nenas enfermos nos que a persoa non teña constancia de recibir as dúas doses.