Só Vilagarcía rexistra máis diagnósticos na área sanitaria

A área sanitaria alcanzou este domingo os 826 casos activos, que implican 27 positivos máis respecto ao día anterior. A diferenza fronte ás últimas xornadas é que nesta ocasión os últimos diagnósticos parecen estar máis centrados na zona de Arousa e non tanto na área de Pontevedra.

O municipio da capital baixou nas últimas 24 horas aos 384 casos activos, 20 menos que o día anterior, Poio queda nos 58 (seis menos) e Marín mantén os 68 notificados o pasado sábado.

Vilagarcía é o único dos concellos que este domingo comunicou un aumento de casos. Concretamente, catro, que elevan o total ata os 68 positivos e que, segundo fontes municipais, non están vinculados ao gromo de Cambados, senón relacionados con contactos estreitos dos que xa constaban como positivos. Por iso o Concello vilagarcián volveu insistir na necesidade de ser "respectuoso coas normas sanitarias en canto ao uso da máscara, de distancia de seguridade e de número máximo de reunións en todos os ámbitos, tamén no privado".

O índice de ocupación hospitalaria permanece estable. A principal novidade é que un dos seis pacientes que permanecían na Uci de Montecelo pasou a planta, onde están 15 pacientes (11 en Montecelo, 1 en QuirónSalud Miguel Domínguez e 2 no Hospital do Salnés). A gran maioría (807) evolucionan no seu domicilio. 1.257 xa se curaron e outros 19 pacientes da área, con patoloxías previas, faleceron desde o inicio da pandemia. En canto á realización de probas, nas últimas 24 horas levaron a cabo 607 PCR, que se engaden ás 40.168 xa efectuadas.