Os sindicatos do centro penal da Lama –Acaip, CCOO, ATP, CIG, CSIF e UXT– informaron este luns de que os traballadores da prisión lograron salvar a vida a dous reclusos que intentaran suicidarse nos últimos días.
No primeiro dos casos, rexistrado o pasado día 6, a rápida intervención dos funcionarios evitou que un interno do módulo de illamento se afogasee utilizando a saba da súa cela, e foi trasladado ao departamento de enfermería en situación de semiinconsciencia. Os sindicatos denuncian "a escaseza de psicólogos e a inexistencia de psiquiatras –hai un externo pero só traballa unhas horas ao mes no mesmo–".
"Estes feitos son un claro exemplo da problemática existente nos centros penais: escaseza de persoal, envellecemento e enfermidade mental dos internos aos que a SGIP e o Ministerio do Interior non dan solución", lamentan nun comunicado.
Dous días despois, o 8 de novembro, rexistrouse outro caso similar. Os funcionarios de servizo salvaron a vida a un interno que sufriu unha sobredose motivada pola mestura de varios medicamentos. Foi derivado en ambulancia a un hospital tras a rápida intervención dos traballadores.
Esta denuncia chega no medio dun conflito entre os funcionarios de prisións e o Ministerio do Interior, ao que lle reclaman melloras laborais. Ata agora xa se produciron dúas xornadas de folga. As próximas xornadas de protestas serán os días 17, 18, 19 e 20 de novembro. Ademais, nesa última xornada está convocada unha manifestación polas rúas de Pontevedra.
