O Ramadán, mes do xaxún musulmán, vívese na comarca de Pontevedra de un modo similar ao que se están desenvolvendo os eventos relixiosos en toda a xeografía galega, marcados polo toque de queda e con límites de aforamento e para as reunións. é unha festa que chega despois de que en 2020 o confinamento total impedise o seu desenvolvemento, pero que este ano tamén terá a cautela como un dos seus eixos centrais, xa que as mesquitas da comarca, en especial a de Pontevedra, son lugares nos que se reúne, tradicionalmente, un gran aforamento, particularmente os venres.
O presidente da Comunidade Islámica de Pontevedra, Mohamed Bah, explica que, se a organización é fundamental xa de seu neste mes no que o horario dos cinco rezos diarios vai cambiando, este ano, a necesidade de seguir unhas normas e estar pendentes da comunidade é aínda maior. "O aforamento da mesquita de Pontevedra é do 30%, como o do resto dos lugares de oración, así que só caben 48 persoas. O toque de queda impídenos realizar o último rezo do día na mesquita", engade, "só estamos a facer catro das cinco oracións: ás seis, ás doce, ás seis da tarde e as nove".
A esa hora (este domingo, en concreto, ás 21.20 horas), permítese a única comida diaria das persoas que realizan o xaxún e logo disto realizaríase o último rezo do día, ás 22.50 horas "pero este é o que non facemos na mesquita, porque non nos daría tempo a acabalo e volver a casa antes do toque de queda".
O Ramadán consiste en xaxuar totalmente, permanecer sen beber e sen fumar ou realizar prácticas sexuais durante as horas de sol, ata a caída do mesmo, momento no que se fixa a realización da única comida da xornada. Son momentos nos que reúnese a familia extensa (non só convivientes) ou amigos e que se viron embazados polas normas sanitarias. Do mesmo xeito, a festa coa que se despide o Ramadán, que este ano se celebrará o 13 de maio, Aíd ao Fitr, reúne a grupos de non convivientes e é unha celebración ampla que este ano se verá restrinxida. "Hai países islámicos nos que non hai rezo, en España hai toque de queda e non se poden celebrar reunións, así que a comunidade segue as indicacións como o farían o resto dos españois. As normas son as mesmas para todos, aínda que a relixión sexa distinta", explica Bah.
Logo dos primeiros compases do Ramadán, o presidente da asociación explica que se detectaron poucos problemas no cumprimento da norma e a xestión do espazo de oración. "Durante os días normais hai pouca xente e só baixamos os veciños máis próximos, así que non hai problema. No venres adóitanse reunir máis persoas e neste último notámolo. O sistema que usamos para controlar é sinxelo: os que chegan primeiro, pasan. Cando xa hai 48 persoas, péchase a porta e non pode entrar ninguén máis", apostila.
A norma cúmprese por interese de todos os participantes e, ao non haber reserva, hóuboos que se desprazaron ata o centro e tiveron que volverse a casa "porque tampouco estaría permitido que rezasen na rúa".
CATRO MESQUITAS. Aínda que hai uns anos só en Vilaboa existía un centro de oración, a Comunidade Islámica foise asentando na comarca e xestionando outros espazos para este fin: Vilaboa segue tendo unha mesquita, Pontevedra conta co local da rúa Gaiteiro de Soutelo, así como con outro espazo, en Rúa Cruz Vermella, no que se reúne a comunidade senegalesa e realizan tamén a oración durante a semana, (aínda que os venres adoitan acudir ao local do Castañal), mentres que Marín conta tamén con mesquita propia.
A comunidade marroquí achega a gran maioría dos e as seguidoras desta fe na cidade, aínda que existen tamén familias de Senegal, Paquistán e Bangladesh.
En canto ao desenvolvemento deste Ramadán, a comunidade islámica está pendente de que as condicións sanitarias mantéñanse ou melloren para planificar o día no que se termina o xaxún. Trátase dunha xornada moi valorada pola comunidade, polo que "estamos a pensar pedir á Subdelegación do Goberno permiso para poder celebrar a oración nun sitio amplo, aberto, como un campo de fútbol ou similar, para non ter que deixar a ninguén fóra", indica Mohamed Bah.
