Os cans volven ser os mestres en Soutomaior. O concello do fondo da ría de Vigo acolleu nun dos seus centros escolares, a escola infantil de Romariz, unha actividade de estimulación sensorial para os alumnos na que, un can, neste caso un exemplar de golden retriever, chamada Uma foi a protagonista.
A actividade forma parte do programa xuvenil de intervención social nos centros educativos organizado polo Concello desde a súa Concellería de Igualdade. A iniciativa busca, mediante a axuda dos animais, mellorar as capacidades sensitivas e motoras dos alumnos e alumnas.
Unha das premisas de funcionamento da actividade é que, dado que o can non fala a mesma linguaxe que os nenos e nenas, o alumnado necesita usar medios como a linguaxe corporal para entenderse.
Trátase, segundo o Concello dunha acción coa que os profesionais de terapia asistida con animais, buscan que o neno empatice co can e cree un vínculo que lle permita comprender como sinte. Deste xeito preténdese mellorar a capacidade motora do neno á vez que se potencian as súas habilidades de relación e expresión.
Segundo indican desde a empresa organizadora destes talleres, a relación cos cans incrementa os niveis de oxitocina, hormona que axuda a diminuír a tensión, combater os efectos da depresión á vez que mellora a construción de relacións de confianza.
A edil de Igualdade, Cristina González, visitou o desenvolvemento desta iniciativa que cualificou como "moi nova e práctica. É todo un acerto apostar polos animais na educación porque conectan cos nenos dun xeito moi especial e nos axudan a inculcar valores moi positivos". Soutomaior xa acollera unha actividade similar con alumnos do IES local nos meses previos á pandemia.