En alerta polo abastecemento. Así están os veciños de San Amaro dependentes do pozo de substitución implementado por Adif hai uns anos, cando as obras da AVE secaron os seus propios mananciais de subministración.
Este colectivo, composto por unhas 13 familias de San Amaro, mantén un conflito co Administrador de Infraestruturas Ferroviarias, posto que a empresa construtora asumiu o compromiso de dotarlles de abastecemento cun pozo que depende dun bombeo e, coa entrega da obra a Fomento, Adif herdou esa responsabilidade.
Aínda que xa intentaron desfacer o trato en ocasións anteriores, os veciños deixaron claro que quen secou os pozos é quen debe facer fronte ao abastecemento, de modo que, ata o momento, a empresa asumiu as avarías e o mantemento. Como o depósito se atopa por baixo da cota dalgunhas das vivendas, a auga debe ser bombeada. O problema agora é que unha desas bombas rompeu o pasado xoves.
Desde entón, unha familia de seis membros (dous deles, menores) está sen abastecemento. Para ter auga potable tiveron que pedirlla a un veciño. José Fernández López, o titular, explicou que "ao principio pensabamos que era un fallo eléctrico, pero cando veu ou fontaneiro xa dixo que hai que reparar a bomba". Adif dixo que si, "pero en canto souberon o custe da reparación dixeron que non poden asumir o gasto". Agora, os veciños seguen á espera de que o organismo dependente de Fomento dea luz verde ás obras.
Outras dúas casas dependen deste bombeo, aínda que, de momento, non padecen os problemas de presión. Adif paga uns 200 euros ao mes polo custo eléctrico deste abastecemento, e as avarías adoitan custar uns 3.000 euros. Os veciños piden novos pozos propios, "pois o custe deste sistema non poderiamos asumilo".
