O Concello de Poio acolleu este xoves o acto de presentación dos novos axentes da Policía local integrados para reforzar o persoal municipal durante o verán. O alcalde, Luciano Sobral, mantivo un encontro informal cos catro axentes, dous mozos e dúas mozas procedentes de Ponte Caldelas, Sanxenxo, Chapela e Moaña, que colaborarán co resto do persoal ante o aumento da carga de traballo que ten este departamento no verán debido á gran afluencia de turistas e visitantes e á alta densidade de tráfico que xera, tamén, o ser concello de paso cara a Sanxenxo.
Ao acto acudiron tamén os representantes do PSdeG, Chelo Besada e Gregorio Agís, así como o Inspector xefe da Policía Local, Antonio Duarte. Os axentes auxiliares superaron unha proba teórica e outra física e traballarán no mesmo horario e funcións que o resto do persoal.
RADAR. Na mesma cita, o concelleiro de Seguridade Cidadá, Xosé Luís Martínez Blanco, anunciou a presenza do radar de velocidade para o control das infraccións no viario local. Trátase dun radar cedido pola DXT que estará durante dúas semanas en Poio.
"É bo que a xente ou saiba", apuntou o edil, que engadiu que principalmente se situará nas estradas locais e provinciais", posto que as accións encamíñanse a avaliar os excesos de velocidade en todo o concello e non só no viario autonómico.