Un total de trece novos alumnos de Educación Primaria incorporáronse este mércores ás aulas no CEIP da Lama. A chegada desta nova fornada de estudantes foi a principal novidade no inicio do curso escolar deste centro, no que non faltou a visita dos membros do tenente de alcalde, David Carreira e do concelleiro de Cultura e Deportes e membro do Consello Escolar, Daniel Vidal ao equipo directivo do centro.
Os dous edís supervisaron o remate das obras de mantemento realizadas polo Concello e a Xunta de Galicia. Trátase duns traballos que permitiron a renovación do sistema eléctrico do centro educativo, así como dos aseos existentes. A Consellería de Educación destinou uns 47.000 euros a esta finalidade.
David Carreira e Daniel Vidal repasaron as novidades en infraestruturas e reorganización que presenta o centro escolar, que ten uns 40 anos de vida.
O director, Rafael Sánchez-Agostiño, exerceu de guía e explicou a importancia de poder contar coa colaboración do Concello nas tarefas de mantemento e reparación de elementos que se foron deteriorando con uso.
O aseo conta con inodoro e lavabo adaptado, así como unha porta accesible, polas súas medidas, para cadeiras de rodas
Así, o persoal municipal acometeu este ano tarefas que foron desde o habitual pintado de aulas e espazos comúns, ata o arranxo de persianas, portas, ou a solución a problemas de humidades e canalización de augas pluviais, etc.
ACCESIBLE. Entre as melloras comprometidas pola Xunta e realizadas a tempo para a estrea de curso está tamén unha pasarela cuberta desde a zona de recepción dos autobuses escolares ata os patios do centro. Trátase, informa o Concello, "dunha demanda feita polos pais e nais de alumnos que se veu cumprida, así como das melloras acometidas pola Xunta de Galicia que supuxo un investimento global duns 47.000 euros".
Outra das vantaxes das que se beneficiarán os alumnos este ano é a eliminación de barreiras arquitectónicas en todo o centro, tanto pola execución dunha rampla como pola reforma dun aseo adaptado ás necesidades especiais, dando así resposta ás necesidades do alumnado que poida padecer limitación de mobilidade. O aseo conta con inodoro e lavabo adaptado, así como unha porta accesible, polas súas medidas, para cadeiras de rodas.
Ademais, a reforma do sistema eléctrico, permitiu corrixir os cadros eléctricos, cambiar as liñas de distribución, redistribuír as liñas de fuerza dos enchufes e instalar novas luminarias de urxencia. Esta intervención contou cun investimento duns 29.600 euros.
