O alcalde de Barro, Xosé Manuel Fernández Abraldes; o tenente de alcalde, Jose Sanmartín, e un grupo de representantes de asociacións de pais e colectivos veciñais do concello acudiron este xoves á entrevista concertada co xerente da área sanitaria do Sergas, José Ramón Gómez, para abordar os asuntos pendentes relativos aos servizos sanitarios dependentes do Sergas neste municipio.
O alcalde manifestou a súa satisfacción á saída do encontro, "pois a principal causa desta reunión era a sospeita que había arredor do futuro do servizo de Pediatría, pero o xerente garantiulle aos veciños, tal e como me dixera a min, que este servizo non ten planificado ningún cambio para o ano 2019, co cal quedamos máis tranquilos". En Barro, os pacientes infantís contan con atención pediátrica os cinco días da semana a partir das 11.15 horas, posto que comparten ao médico pediatra co consultorio de Monte Porreiro. Na mesma cita abordáronse outras cuestións pendentes, como a proposta para construír un novo ambulatorio para poder suplir a edificación actual, que padece limitacións de espazo e calidade, por ter máis de 40 anos, así como detalles sobre a cobertura das baixas dos titulares de medicamento xeral.
CONCENTRACIÓN. Os veciños están descontentos tras a recente baixa causada por un dos dous médicos de cabeceira do centro, que non foi cuberta. A este respecto, o xerente comprometeuse a revisar a situación para tratar de cubrir ese posto, xa que a ausencia dun dos médicos está a provocar atrasos nas citas. A pesar desta promesa, un grupo de usuarios mantén unha convocatoria para manifestarse este venres ante o centro en sinal de protesta polos recortes en calidade asistencial derivados da non cobertura das baixas.
