Atravesar o núcleo urbano da parroquia de Combarro converteuse o mércores nunha auténtica odisea para centenares de condutores. A inauguración da Festa do Mar, sumada ás altas temperaturas (que invitaban a gozar dunha xornada de praia), provocou extensas retencións na estrada autonómica PO-308. O máis afectados resultaron os automóbiles que circulaban desde Pontevedra en dirección a Sanxenxo. Boa parte deles chegaron a tardar preto de 40 minutos en cubrir o tramo entre a recta da Seca e a zona de Chancelas. As colas, pola súa banda, estendíanse desde os accesos ao centro histórico de Combarro e ao peirao da Canteira, epicentro do evento, ata a rotonda que enlaza a comarcal coa rotonda na que se inicia o Variante Norte.
Aínda que os atascos son tónica habitual a estas alturas do ano, os afectados empezan a estar cada vez máis fartos. Tal e como apuntaba o mércores un comerciante atrapado no medio do colapso,"non todos os que conducimos por esta estrada estamos de vacacións. Isto atrásanos moito as entregas", lamentou. Esta situación volve pór sobre a mesa a necesidade de que Poio conte cun viario alternativo á PO-308. Neste sentido, cabe recordar que o PXOM de Poio reserva un espazo para a construción dunha estrada que partiría das inmediacións do tanatorio municipal e do Consistorio e desembocaría co viario provincial que enlaza coa Armenteira, nas proximidades do CEIP Espedregada de Raxó.
Atravesar o núcleo urbano da parroquia de Combarro converteuse nunha odisea
O desenvolvemento deste proxecto é unha das actuacións que o tripartito confía en impulsar ao longo do presente mandato. No seu día, o PP criticou duramente esta proposta, ao asegurar que atravesaría o corazón de núcleos como O Sartal, O Pereiro ou Ucha, algo que o Goberno local nega de xeito taxativo.
