O alcalde de Soutomaior, Agustín Reguera acompañado do seu homólogo de Ponte Caldelas, Andrés Díaz, e os técnicos de Augas de Galicia e Naturgy, visitaron onte a central eléctrica Ponche do Inferno para asinar unha acta de recoñecemento do terreo necesaria para avanzar cos trámites do proceso de extinción da concesión.
A Xunta retomou o mes pasado o proceso de caducidade da concesión anunciando no DOG e o Boletín da provincia o procedemento e este acto parece o primeiro paso visible para o novo procedemento. Descoñécese se no mesmo teranse en conta os pasos dados no ano e medio anterior, cando o expediente de extinción do mesmo salto foi iniciado a instancias do colectivo Pladever, de Ponte Caldelas.
Tal e como apuntou onte o Concello de Soutomaior, segundo o Plan Hidrolóxico de Galicia, o prazo de concesión para a central hidroeléctrica finalizou en marzo de 2017, logo de 131 anos de explotación e durante este tempo, a falta de adaptación da infraestrutura ás normativas ambientais motivaron que a presa impedise o tránsito de especies migratorias como a anguía, o salmón e a lamprea.
O alcalde de Soutomaior, Agustín Reguera, cualificou esta visita como "un paso máis para poder recuperar a canle orixinal do Verdugo" e recordou que Augas de Galicia xa cualificou en 2019 ao río Verdugo como unha canle "moi modificada" como medida de protección ambiental incluída na Directiva Marco da auga Europea.
Do mesmo xeito, o primeiro edil indicou que a eliminación da presa e a posterior restauración da canle orixinal do río implicaría a recuperación dun tramo de dous quilómetros do río Verdugo e cinco do San Vicente
O alcalde de Ponte Caldelas, Andrés Díaz, tamén estivo presente neste acto, no que non faltaron representantes de Naturgy, empresa concesionaria da explotación. Ao contrario que Reguera, Díaz expresou o seu desexo de que a explotación siga adiante acatando as normas ambientais.
Andrés Díaz afirma que "o actual aproveitamento debe adaptarse á normativa ambiental vixente, da mesma maneira que entendo que hai que defender os postos de traballo que xenera esta infraestrutura ou buscarlles unha alternativa laboral".