A Consellería de Infraestruturas reforzará nos próximos días a seguridade viaria dos peóns na estrada PO-308, ao seu paso
Así o anunciou este martes a Axencia Galega de Infraestruturas, que con esta actuación, que se realiza con carácter urxente e fóra de calquera dos proxectos existentes para a PO-308, quere mellorar no posible as condicións para os transeúntes neste punto. Este obxectivo conseguirase mediante a instalación de elementos de sinalización que advirtan aos condutores da existencia dun paso de peóns neste punto.
Tal e como apunta a Xunta, trátase dunha actuación inmediata que quere dar unha solución áxil ás demandas trasladadas polos veciños nos últimos meses, despois de que un novo atropelo a un menor (por sorte, sen consecuencias fatais), reactivase as alertas veciñais sobre a situación deste tramo.
Infraestruturas apunta que esta actuación non impedirá que se desenvolvan todas as intervencións contempladas no proxecto existente para a modernización e mellora do tramo. "Estas medidas complementaranse posteriormente coas obras de mellora de seguridade viaria recollidas no proxecto de actuación entre Fontenla e Combarro, que se someteu a información pública o pasado 11 de decembro", recorda o departamento presidido por Ethel Vázquez, que engade que "tamén redundará no incremento de seguridade dos peóns, a senda peonil que se proxecta construír nesta contorna".
A Xunta está a completar a renovación integral deste viario entre Poio e Sanxenxo para reforzar de forma substancial a súa seguridade viaria. En actualidade, o tramo de Raxó acolle a única fase en obras do proxecto dentro de Poio.
