A Xunta destaca a planta de ultraconxelado de produtos do mar de Mos para almacenar capturas en pandemia

A conselleira do Mar, Rosa Quintana, destacou este venres a importancia de contar con instalacións innovadoras adaptadas á realidade dos profesionais do mar para facilitar a súa actividade e facela máis competitiva. Nesta liña, puxo en valor o papel que desempeñou a planta de frío e elaboración de produtos do mar que ten en Mos a empresa Irmáns Fernández Ibáñez Consignatarios de Pesca, que durante varios meses de pandemia permitiu o almacenamento de capturas. Así o indicou na visita a estas instalacións, onde estivo acompañada pola directora xeral de Pesca, Acuicultura e Innovación Tecnolóxica, Mercedes Rodríguez. 

Alí, a titular de Mar explicou que, grazas a esta infraestrutura, a flota de palangre de superficie puido almacenar as súas capturas durante moitos meses de pandemia, pois no inicio da alerta sanitaria e ante as dificultades de comercialización, a empresa incluso ampliou a capacidade de frío da que dispuña a planta. Quintana destacou que esta instalación conta con cámaras de -50ºC, que permiten manter o produto ultraconxelado, en particular atún procedente do océano Índico, con todas as súas propiedades organolépticas desde a súa recepción ata a súa distribución. 

Deste xeito, esta planta, deseñada con características de eficiencia enerxética, dedícase á preparación, clasificación e almacenamento de peixe para a súa elaboración e venda, unha parte para o consumidor final en grandes superficies.

APOIOS AO SECTOR. Rosa Quintana destacou a importancia de brindar apoios ao sector para dotar a actividade de instalacións que faciliten o seu labor. Máis aínda, incidiu, nun contexto marcado polas dificultades derivadas da covid-19, no que o sector marítimo-pesqueiro foi declarado esencial. A conselleira destacou que esta planta recibiu unha axuda da Xunta de máis de 5,3 millóns de euros na convocatoria de achegas de 2019 a pemes de transformación de produtos do mar. Na convocatoria deste ano, o Executivo galego destina a estes apoios un total de 16 millóns de euros cofinanciados co Fondo Europeo Marítimo e de Pesca (FEMP). 

Con eles, o Goberno autonómico apoia ata 50% dos investimentos que fagan as pemes que fomenten a sustentabilidade ambiental e son subvencionables, entre outros proxectos, aqueles que contribúan a aforrar enerxía ou reducir o impacto no medio ambiente, que melloren a seguridade, a hixiene, a saúde e as condicións de traballo e que axuden á transformación de capturas de peixe comercial que non se poidan destinar ao consumo humano. Tamén son subvencionables aquelas actuacións relacionadas coa transformación de produtos de acuicultura ecolóxica, así como as que dean lugar a novos e mellores produtos, procesos e sistemas de xestión e organización. 

Quintana subliñou que na convocatoria do ano pasado beneficiáronse destas achegas máis de 40 proxectos, por un importe de preto de 15 millóns de euros e que, desde 2016, concedéronse este tipo de axudas a ao redor de 230 iniciativas de transformación de produtos do mar por valor de máis de 57 millóns de euros.