A Consellería de Medio Ambiente, Territorio e Vivenda emitiu o informe ambiental estratéxico correspondente á modificación do proxecto da Cidade do Transporte de Ponte Caldelas, que agora prevé un novo acceso suroeste para o tráfico, un incremento das prazas de aparcadoiro e máis beirarrúas e zonas verdes.
De acordo coa Xunta, que fixo público o venres este avance, esta modificación afecta a un ámbito industrial de case 90.000 metros cadrados, que se adaptará ás "necesidades actuais" e "potenciará a oferta de chan empresarial" na comarca de Pontevedra.
Ademais, a Consellería dispón no seu informe que "non será preciso" someter este cambio do proxecto ao procedemento de avaliación ambiental estratéxica ordinaria porque este cambio non proporcionará modificacións novas ou significativas no ámbito paisaxístico. A Xunta matiza que "a modificación ten aplicación sobre a parcelación e os usos das superficies en cuestións puntuais, como a aliñación das naves que se constrúan na mesma ou na mellora dos servizos e dotacións das parcelas do parque empresarial", tal e como se reclamou en varias ocasións desde o Concello, ao detectar que había firmas interesadas en adquirir o chan, pero que este non contaba coa parcelación a efectos prácticos, ao carecer de posibilidades de segregación ou indicacións sobre alienación e disposición das naves. Outro elemento interesante desta modificación -moi celebrada o venres polo Goberno Local- é o feito de que recolle "un cambio de uso dos terreos e dalgunhas parcelas para axustarse as actividades económicas". A superficie inaugurouse en 2005, pero non espertou o interese das empresas do sector e só unha gasolineira se instalou nela nestes 15 anos.
