A Xunta suprimirá prazas de estacionamento na Barca para mellorar a visibilidade

O último accidente rexistrado na PO-308 ao seu paso polo núcleo de San Salvador, no que unha menor de idade resultou ferida grave tras ser golpeada por dous automóbiles (un camión e un turismo) mentres cruzaba por un paseo para peóns, non só serviu para reabrir a eterna polémica sobre a seguridade viaria nesta estrada, senón tamén para iniciar unha disputa institucional entre o Concello de Poio e a Xunta de Galicia. Ambas as administracións encerelláronse nun cruzamento de reproches que se iniciou o pasado martes, un día despois do sinistro, cando o concelleiro de Seguridade Cidadá, Xosé Luís Martínez, denunciou que a Consellería de Mobilidade fixera caso omiso dun escrito enviado polo Concello para esixir o repintado de varios pasos para viandantes.

Agora, a resposta do departamento dirixido por Ethel Vázquez non se fixo esperar. O encargado de dar réplica a estas declaracións foi o director da Axencia Galega de Infraestruturas, Francisco Menéndez, que remitiu unha carta ao alcalde en funcións, Luciano Sobral, no que o invita a abordar "con maior prudencia a análise dos accidentes". Ademais, na misiva recórdaselle ao rexedor nacionalista que a Xunta apostou no seu momento por eliminar algunhas prazas de aparcadoiro situadas nas proximidades da sinalización horizontal para peóns, co obxectivo de mellorar "a visibilidade", unha proposta que foi descartada polo Goberno local. Así mesmo, a Consellería de Mobilidade recorda que, neste caso, o atropelo produciuse nun tramo regulado por un semáforo cuxo funcionamento é responsabilidade do Concello.

O departamento de Infraestruturas confirma, ademais, que procederá proximamente a suprimir estes espazos de estacionamento en San Salvador, así como a adoptar outras medidas para garantir que tanto os condutores como os peóns dispoñan da maior visibilidade posible á hora de atravesar a avenida da Barca. Precisamente, este déficit foi unha das posibles causas do accidente do pasado luns, tal e como se recolle no informe elaborado pola Policía Local de Poio, que descarta que se producise imprudencia algunha tanto por parte da ferida como dos condutores.

Para rematar, a Xunta lamenta "as manifestacións realizadas polo Concello ao respecto do lamentable accidente" e considera necesario "apostar por unha colaboración instittucional máis seria e responsable".