Un de cada tres veciños da área sanitaria de Pontevedra e O Salnés pasará este fin semana suxeito a algunha das restricións aprobadas pola Xunta para controlar os "puntos quentes" nos que hai máis perigo de transmisión da covid. 23.960 habitantes estarán condicionados polo nivel máximo de restricións, 24.242 polo nivel alto e 50.688 polo nivel medio. Isto é o que supón e a quen afecta cada "chanzo".
Limitacións máximas en Vilanova e Cambados
Vilanova (10.239 habitantes segundo o IGE) atópase actualmente no nivel máximo de restricións e, a partir de de o venres, tamén o estará Cambados (13.721 residentes). ¿Que significa estar en alerta vermella? Por unha banda implica o peche perimetral, polo que ningún cidadán pode entrar ou saír do concello salvo que achegue unha causa xustificada, como por razóns de traballo, formación ou coidado de persoas dependentes. Por outro, significa que a hostalería debe cesar a súa actividade de face ao público e limitala ao servizo a domicilio. A Xunta permite a entrega de comida a domicilio ata as 24.00 horas e a recollida no local para o consumo en casa ata as 22.30 horas.
As reunións só están permitidas entre convivientes, salvo no caso de actividades laborais, empresariais ou educativas. O aforamento dos lugares de culto está limitado a un terzo da súa capacidade, mentres que nos velorios está fixado un tope de dez persoas (convivientes ou non) no interior e de 25 en espazos abertos.
As bibliotecas e equipamentos culturais non poderán superar o 30% da súa capacidade, do mesmo xeito que as competicións deportivas, cines e teatros. Nos locais pechados o límite é de 250 persoas e nos locais ao aire libre, de 500. O aforamento do comercio é do 50% e as zonas comúns dos centros comerciais están limitadas ao 30%.
Restricións altas (outra vez) no concello de Marín
O municipio marinense continuará polo menos ata o vindeiro luns no nivel alto de restricións. Estas permiten a mobilidade co resto de concellos non confinados, pero seguen limitando notablemente a actividade da hostalería, que só pode funcionar en terrazas e ao 50% de aforamento.
As reunións poden ser de non convivientes, pero non poderán ter máis de catro participantes se se celebran en interiores nin máis de seis se ocorren en espazos abertos. Nos lugares de culto o aforamento permitido elévase ao 50%; se embargo, as condicións dos velorios, as bibliotecas, as competicións deportivas e os cines e teatros seguen sendo as mesmas que as do nivel máximo de restricións.
No comercio mantense o límite do 50% de aforamento e nos centros comerciais o do 30%.
Nivel medio en Soutomaior, Cerdedo-Cotobade e Vilagarcía
Soutomaior e Cerdedo-Cotobade accederán este venres ao nivel medio de restricións, no que permanecerá unhas xornadas máis o concello de Vilagarcía. Segundo os decretos aprobados pola Xunta, a principal diferencia respecto ao nivel superior é que a hostalería pode funcionar ao 30% no interior (cun tope de catro non convivientes por mesa) e ao 50% en exterior (cun máximo de seis non convivientes por mesa).
No resto de concellos da área sanitaria (que aglutina a 303.292 habitantes) manteranse as restricións de nivel medio-baixo, con terrazas limitadas ao 75% de ocupación e interiores de locais de hostalería limitados ao 50%.
Nas bibliotecas, competicións deportivas e eventos culturais o aforamento sobe ao 50%, que se mantén no comercio.
Todos os concellos están afectados polo toque de queda (polo menos ata o domingo). Así, entre as 23.00 e as 06.00 as persoas só poden circular polas vías ou espazos públicos por mor dalgunhas das razóns autorizadas, como a adquisición de medicamentos, a asistencia a centros sanitarios, o cumprimento de obrigacións laborais, o coidado de persoas non autónomas ou situacións de necesidade.
Próxima revisión
O subcomité clínico previsto para o vindeiro venres revisará de novo a situación epidemiolóxica de cada concello e en función desta decidirá se as restricións mantéñense ou sofren variacións. Os cambios entrarán en vigor o luns.
"Houbo asintomáticos que fixeron vida normal, o número pode subir"
O elevado número de activos detectados nos últimos días e a incidencia acumulada xa facían presaxiar a subida de Cambados ao nivel máximo de restricións. "Non nos colleu por sorpresa", confirma a súa alcaldesa, Fátima Abal. A gran incerteza débese a como evolucionará a situación pois, aínda que os tres brotes principais están localizados, a rexedora informaba este mércores de que hai constancia de varias persoas contaxiadas "asintomáticas" que estiveron a facer "vida normal" ao recibir un primeiro resultado negativo nas probas, polo que é posible "que o número total de activos aumente nos vindeiros días". Ademais, alertou da "repercusión" que poden ter as celebracións do Día da Nai, xa que viu nas redes imaxes de comidas familiares "que tamén poden aumentar o número" de positivos.
Abal subliñou que varios veciños do municipio están ingresados, algúns na UCI, polo que urxe "ser precavidos". "As restriccións máximas non son medidas que agraden a ninguén, pero creo que van beneficiar a toda a poboación cambadesa á hora de reducir vos activos (...). Non podemos baixar a garda ante este virus, que é moi fácil de contaxiar e moitas veces produce consecuencias nefastas".
"Non volvamos caer no exceso de confianza, o covid segue aí"
Cacabelos, esgrimiu este mércores unha "valoración máis que positiva" da relaxación das restricións no municipio grovense, xa que supón "recuperar a ilusión" e avanzar cara á "recuperación da actividade económica e turística" nun momento clave, ás portas do verán. No entanto, se hai algo no que insiste o rexedor é na necesidade de seguir mantendo o virus baixo control a través das medidas recomendadas polas autoridades sanitarias. "Fago un chamamento á prudencia. Non volvamos caer no exceso de confianza nin relaxemos as medidas de prevención nos ámbitos particulares, que é onde se rexistran a maioría dos contagios. Retomamos o nivel previo que tiñamos en Semana Santa, o cal nos permitiu traballar de xeito importante, pero o covid segue aí, así que moita prudencia", trasladou a este xornal.
O peche perimetral puxo en evidencia "o privilexiados que somos cando temos liberdade de movemento". Con todo, o alcalde tamén apela á prevención de face ao fin do estado de alarma ou a apertura da fronteira lusa. "As chegadas doutras comunidades e do norte de Portugal benefíciannos moito, pero hai que actuar con cautela. O covid vive do ser humano".
