Unha inspección a un establecemento autorizado para a venda de material pirotécnico do sur da provincia de Pontevedra, que almacenaba case catro veces máis explosivos dos permitidos, levou á Garda Civil a investigar catro persoas en Barcelona por fornecer material con documentación presuntamente falsificada.
Segundo informaron este luns fontes do instituto armado, os investigados son o responsable da empresa pirotécnica provedora e tres traballadores.
A investigación, a cargo da Policía Xudicial da Garda Civil de Tui, iniciouse por mor dunha inspección no establecemento de Pontevedra, onde se incautaron 225 quilos de material pirotécnico, cando a capacidade máxima de almacenamento autorizada é de 50.
Ao sospeitar que tanto os albaráns como as cartas de porte que amparaban a compra e transporte destes produtos poderían estar manipulados ou ser falsos, realizouse con autorización xudicial unha inspección no establecemento provedor, situado na provincia de Barcelona, onde se detectaron irregularidades nos asentos contables da empresa.
No transcurso da inspección, a Garda Civil incautouse de diversa documentación e soportes informáticos, que xunto coa análise dos tacógrafos dos vehículos que transportaban a mercancía reforzaron os indicios sobre a presunta falsificación documental que se estaba investigando.
Con este modus operandi posibilitábase que o establecemento comercial, situado no sur da provincia de Pontevedra, puidese almacenar ilegalmente unha cantidade superior á autorizada, o que podía supoñer un serio perigo para a seguridade cidadá.
As pescudas da Garda Civil concluíron coa investigación penal do responsable e os tres empregados da empresa provedora por un delito de falsidade documental e a denuncia administrativa do propietario do local comercial en Pontevedra.
