Catro parques comarcais de bombeiros da provincia de Pontevedra, situados nos municipios de Bueu, O Porriño, Vilagarcía de Arousa e Ribadumia, serán xestionados de xeito público a partir do próximo 31 de maio.
O rescate da súa concesión ao sector privado, aprobado polo Consorcio provincial contra incendios integrado pola Deputación de Pontevedra e a Xunta de Galicia, suporá a subrogación de todo o persoal operativo que traballa nos parques.
A presidenta provincial, Carmela Silva, celebrou o "bo ton" entre as partes, incluída a sindical, para chegar a un acordo que permitirá que este servizo "esencial" para a cidadanía sexa xestionado de xeito público a través deste consorcio.
Santiago Villanueva, director xeral de Urxencias da Xunta de Galicia, sinalou pola súa banda que este modelo será "beneficioso" para os cidadáns.
A memoria que avala o cambio de modelo no servizo recolle un estudo pormenorizado dos aspectos sociais, xurídicos, técnicos e financeiros do que supón o cambio de modelo no servizo de extinción de incendios e salvamento.
O documento conclúe que, desde o punto de vista económico, a xestión directa destes parques é a modalidade "máis sostible e máis eficiente", e recolle que o cálculo dos custos de funcionamento "é menor" que o actual.
A figura laboral mediante a que se subrogará a todo o persoal será a de persoal indefinido non fixo, polo que a memoria recorda que deberán ofertarse as prazas para a súa cobertura definitiva.
