O Exército de Terra, a través do seu Mando Compoñente Terrestre, no ámbito da Operación Balmis no marco da crise sanitaria, despregou este xoves unidades da Brilat para, entre outras, realizar labores de desinfección en dúas residencias en Lalín e Vigo
Segundo informou a Brilat, as Forzas Armadas "irán adecuando a súa resposta e esforzos durante o estado de alarma, adaptándose ao desenvolvemento da pandemia e manténdose preparados para actuar".
En concreto, este xoves os equipos de descontaminación NBQ (Nuclear, Bacteriológico, Químico) realizaron labores de desinfección nas residencias DomusVi en Lalín e Vigo, así como no centro de reeducación especial en Pontevedra.
A elas súmanse misións de presenza e recoñecemento nas localidades de Covelo, Soutomaior e O Carballiño; así como nas asturianas de Riosa e Sariego; e nas castelás de Cervera de Pisuerga e Fuensaldaña.
Tamén desenvolveron durante este xoves misións de apoio co despregamento da estación de triaje no Hospital Universitario Central de Asturias en Oviedo (Huca), así como a colaboración coa Garda Civil no control fronteirizo no límite de Galicia con Portugal nas provincias de Pontevedra e Ourense, con patrullas móbiles.
A Brilat recorda que estas actuacións poderán verse modificadas "en tempo e lugar por motivos operativos ou a recepción de novas instrucións".
