O envorco electoral que se rexistrou na provincia de Pontevedra nos comicios municipais de 2015 consolidouse catro anos máis tarde. O PP non puido cumprir o obxectivo que se marcara de recuperar a maioría absoluta na Deputación e que deixa a porta aberta a un goberno en minoría do PSOE ou á renovación da coalición de Goberno da formación socialista e o BNG. A falta da concreción da fórmula pola que optará o partido do puño e a rosa, os resultados electorais rexistrados na provincia volverán a situar á socialista Carmela Silva á fronte de Corporación provincial.
Abel Caballero, alcalde de Vigo e mentor político de Carmela Silva, ocupouse o pasado 15 de xaneiro de facer oficial que esta sería a candidata do PSOE a repetir no cargo no caso de que, como así sucedeu, o resultado das eleccións do 26M o permitiran. "Acabamos cunha Deputación do século XIX e fixémolo nun goberno de coalición e da man das dúas grandes cidades (Pontevedra e Vigo)", declarara Silva no seu día. Tanto ela como Mosquera efectuaron durante os últimos catro anos declaracións nas que destacaban a boa sintonía coa que estaban a dirixir a institución provincial con áreas competenciais perfectamente definidas para ambas as formacións.
O PSOE mantivo nas eleccións municipais a tendencia á alza que se rexistrou nas xerais do 28 de abril e que lle permitiu, por primeira vez na historia da Deputación, superar ao PP en número de escanos. Así, o Partido Socialista gaña tres escanos respecto das eleccións de 2015 (de 10 pasa a 13), mentres que o PP, que perde dous escanos, (queda como segunda forza máis votada, con 10 representantes na cámara provincial). O BNG, que contaba con catro deputados, terá tres na próxima Corporación, da que desaparece o único membro da coalición electoral SON.
SEN MAIORÍA ABSOLUTA. Nas pasadas eleccións municipais o pacto alcanzado entre o PSOE e o BNG supuxo o primeiro cambio de signo político en todo o período democrático da Deputación de Pontevedra. Durante máis de tres décadas todos os presidentes que tivo a institución foron da formación conservadora. Os populares perderan nos comicios de 2015 cinco deputados na Corporación respecto de 2011 e, con iso, o Goberno con maioría absoluta.
A cámara provincial está formada por 27 deputados, que teñen que ser forzosamente concelleiros electos. A designación dos membros da Corporación realízana os novos edís na sede da xunta electoral de cada partido xudicial, aínda que para iso deben constituírse previamente as corporacións locais (o 15 de xuño) e pasar os prazos establecidos para a presentación de reclamacións. é dicir, non antes de 40 días despois das eleccións que tiveron lugar este domingo, o que situaría o Pleno constituínte da nova Deputación provincial na primeira metade do mes de xullo, como moi pronto.
MESA DE IDADE. A sesión plenaria para a configuración da Corporación estará presidida polo deputado de maior idade. Na mesa tamén estará o máis mozo e técnicos dos Servizos Xurídicos da Deputación que se encargarán de velar polo normal desenvolvemento da votación na que, se todo transcorre como se prevé, Carmela Silva resultará reelixida presidenta.
A lei electoral divide a provincia en sete partidos xudiciais, e en función da poboación a cada un ten asignado un número de representantes na Deputación. O partido xudicial de Vigo ten 11; o de Pontevedra, 7; os de Cambados e Tui, tres cada un; e os da Estrada, Lalín e Ponteareas, un cada un. Para a repartición de representantes só se teñen en conta a aqueles grupos que obteñen representación municipal, e aí aplícase, igual que na repartición de concelleiras, a lei D'Hont.
O candidato do PSOE á Alcaldía de Pontevedra, Tino Fernández (que ocupará un dos catro escanos que este partido logrou nas eleccións do 26M), destacou este domingo a "magnífica noticia" de que a formación do puño e a rosa vai seguir gobernando a Deputación "como primeira forza" da institución provincial. "Vainos permitir consolidar o traballo desenvolvido durante os últimos catro anos para seguir mellorando o benestar dos cidadáns", subliñou Fernández.
