O reinicio do curso escolar en Galicia supuxo, nos tres primeiros días, o peche de 11 aulas e uns 800 casos activos máis entre a comunidade que acode diariamente -persoal docente, outros traballadores e alumnado-. Actualmente, hai un total de 13.891 casos positivos vinculados a centros educativos, fronte aos ao redor de 13.000 dos que se informaron o luns co arranque do curso escolar tras as vacacións de Nadal.
No caso da área de Pontevedra, son 1.666 os contaxiados vinculados por idade ou profesión aos centros de ensino. A eles habería que sumar 21 afectados máis entre os máis pequenos, en escolas infantís.
En canto ás clases inoperativas en instalacións educativas pontevedresas por mor da pandemia, non se rexistra ningún peche nos últimos sete días.
Destaca o caso do Ies A Xunqueira II, que é o centro educativo máis afectado polo coronavirus na área, con34 casos activos. Pode consultar a listaxe de centros afectados no seguinte enlace
GALICIA. Actualmente en Galicia hai un total de 13.891 casos positivos vinculados a centros educativos, fronte aos ao redor de 13.000 dos que se informaron o luns co arranque do curso escolar tras as vacacións de Nadal.
Nas escolas infantís pecháronse 18 aulas nos últimos sete días (hai que ter en conta que estes centros non pechan durante todo o período do Nadal) e rexistran 170 casos positivos vinculados a eles.
Pola súa banda, a área de Vigo é a que rexistra o maior número de casos activos vinculados a escolas infantís, con 45 e oito aulas pechadas. Mentres, na Coruña hai 41 positivos e seis aulas tamén afectadas.
Séguenlle a área de Santiago-Barbanza, con 24 casos; Pontevedra, con 21; Lugo, con 18; Ourense, con 13; e Ferrol, con 8.
PROTOCOLO. Fontes da Consellería de Educación explicaron a Europa Press que para o peche de aulas aplícase o novo protocolo -de brote a partir de cinco-, aínda que o luns, co arranque do curso o Ministerio de Sanidade aínda non notificara o documento e isto quere dicir que algún peche pode estar suxeito ás medidas anteriores.
Sobre as baixas do persoal docente, Educación non dispón de datos actualizados, pero asegurou que "séguense cubrindo de xeito exprés". O luns había rexistradas unhas 800 baixas laborais e cubríronse na mañá dese día unhas 700.
