O conselleiro de Medio Rural, José González, informou este mércores de que xa comezaron as curtas da madeira afectada pola praga do nematodo, que se estendeu por municipios do sur da provincia de Pontevedra.
Tras a súa aparición en Galicia en 2010 no municipio das Neves, houbo novos positivos en 2018 en sete árbores localizadas nos municipios pontevedreses do Porriño, Tui, Ponteareas e Salvaterra de Miño --aquí houbo outro caso en 2016--. Esta problemática prodúcese nunha zona de Galicia na que a vaga de incendios de 2017 tivo gran incidencia.
A preguntas da prensa este mércores, o conselleiro demandou "a máxima colaboración posible dos concellos e dos propietarios para que nós, pondo nós os medios económicos, podamos entrar e facer a curta".
Respecto diso, defendeu que a Xunta "fixo os seus deberes" para informar os positivos, mentres puxo "todos os medios" para "cortar canto antes a madeira que está en malas condicións" e aquela que está afectada na zona ao redor dos positivos.
