O condutor que foi interceptado a pasada fin de semana en Ponteareas, e que levaba no seu vehículo a unha moza supostamente contra a súa vontade, compareceu este martes no xulgado desta localidade.
Fontes xudiciais informaron a Europa Press de que este home, que quedou libre en sede policial tras prestar declaración a fin de semana, fora citado para este martes e compareceu no xulgado de instrución número 3 de Ponteareas.
O maxistrado comunicoulle a súa condición de investigado por un suposto delito de detención ilegal e outro contra a seguridade viaria (condución baixo influencia de bebidas alcohólicas). No entanto, non determinou a adopción de ningunha medida cautelar con respecto a el.
Por outra banda, a moza que viaxaba con el no coche tamén estaba citada para este martes, pero manifestou a súa vontade de non acudir ao xulgado. Con todo, o xulgado vai citala de novo, "por se cambia de opinión".
FEITOS INVESTIGADOS. Os feitos investigados ocorreron na madrugada do pasado domingo, cando a Garda Civil interceptou ao condutor en Ponteareas despois de que a moza chamase á Policía Nacional para alertar de que ía no vehículo en contra da súa vontade.
Segundo relatou a muller, tivo problemas para abrir a porta da súa casa en Vigo e pediu axuda ao mozo, quen lle pediu que se subise ao coche para prestarlle o teléfono móbil e pedir axuda.
Entón, segundo a versión dela, o condutor emprendeu a marcha e negouse a parar cando ela lle pediu baixar do coche. A moza chamou á Policía Nacional, e este corpo solicitou a colaboración de Garda Civil para localizar o coche.
Cando a Benemérita interceptou ao condutor, en Ponteareas, comprobou, ademais, que este presentaba síntomas de alcoholemia, que se confirmaron coa realización do test pertinente.
