O Concello de Tui contratou á pirotecnia do empresario detido este martes encarcerado pola explosión dun almacén ilegal que matou a dúas persoas e feriu a outras 37 na parroquia de Paramos para unha exhibición con motivo das festas de San Telmo, o pasado mes de abril.
O alcalde de Tui, Carlos Vázquez Padín, xustificou este martes en rolda de prensa que se recorreu á empresa La Gallega por ser a pirotecnia local, como en anos anteriores fixeron os seus predecesores.
Sobre o feito de que haxa pendente de executar unha sentenza que obriga ao peche e demolición parcial das instalacións de La Gallega na parroquia de Baldráns, motivo polo que o xulgado o multou con 300 euros, esgrimiu que cría que o material empregado na exhibición procedía dun almacén que o empresario ten na Cañiza, outra localidade da provincia.
En todo caso, Vázquez Padín confirmou que deu orde de que non se pague esa factura, que ascende a uns 10.000 euros, e afirmou: "Prefiro ter un problema administrativo cun acredor a ter que dicir aos meus veciños que lle compramos fogos artificiais a esa empresa".
Así mesmo, avanzou que deu orde ao interventor municipal para non pagar a factura por esta exhibición ao empresario encarcerado, por un monto de 10.000 euros.
O alcalde de Tui reiterou que descoñecía a existencia de almacéns clandestinos de material pirotécnico e solicitou o respaldo de todas as administracións, en vista dos cuantiosos danos materiais, ademais dos persoais, e a cifra de damnificados.
BALANCE. O centro de atención aos afectados pola explosión leva contabilizados 328 expedientes e 702 damnificados. Nestes momentos hai 19 familias en proceso de reacollo, sete das cales terán unha solución nos próximos días, segundo concretou o alcalde de Tui. Resultaron afectadas 290 vivendas, das cales 132 tiñan seguro contratado por parte dos seus propietarios.
Un total de 31 vivendas resultaron completamente destruídas, 60 con danos estruturais, 50 con graves danos na cuberta, 191 con danos na carpintería exterior, máis de 100 con danos na carpintería interior e outras 100 necesitan repor o tellado, mentres que 31 presentan gretas. Así mesmo, a explosión causou danos en 34 vehículos.
