A xunta de portavoces do Concello de Tui acordou este luns levar ao pleno do xoves a aprobación dun millón de euros, con cargo ao remanente de tesourería, para destinalo aos afectados pola explosión dun almacén ilegal de material pirotécnico na parroquia de Paramos.
Na mesma sesión, o pleno abordará a conveniencia de solicitar a declaración de zona catastrófica en base a un informe elaborado pola Secretaría municipal e noutro que se encargará a un técnico externo.
Existe acordo entre todos os grupos da corporación de que na distribución dos fondos de urxencia haxa prioridade para cubrir as necesidades básicas de alimentos, roupa e transporte.
Adicionalmente, a entidade financeira Abanca abriu unha conta para realizar doazóns para os afectados de Paramos e hai tamén activa unha campaña na plataforma GoFundMe a iniciativa dunha veciña de Tui, cuxo obxectivo é alcanzar os 200.000 euros.
O Concello de Tui informa tamén de que ata o momento hai abertos 325 expedientes de incidencias con 692 persoas afectadas pola explosión do pasado mércores.
Unha vintena de empregados da corporación local están a atender aos afectados no punto de atención habilitado no centro de formación municipal.
