O CPR San Francisco de Vilagarcía sumouse este sábado á lista de centros educativos que teñen algunha aula pechada debido ao coronavirus, que son dez en toda Galicia e dous na área sanitaria de Pontevedra e O Salnés. E é que segue clausurada unha unidade no CEIP Plurilingüe de Chancelas de Poio.
Os datos actualizados este sábado pola Xunta revelan que son 17 os casos activos de covid na comunidade educativa da área pontevedresa, un máis que este venres. Aí está incluído o que levou a pechar a aula de Vilagarcía.
En toda Galicia, as infeccións activas que afectan a centros educativos eleváronse a 251, nove máis que o venres, mentres que o número de aulas pechadas aumentou a dez, dúas máis.
Por áreas, crecen os casos nas da Coruña (+13), de Ferrol (+1) e Pontevedra (+1), mentres que descenden nas de Vigo (-5), Ourense (-1) e mantéñense igual en Lugo e Santiago.
A Coruña segue sendo a área máis afectada, con 82 casos; seguida de Vigo, con 43; Lugo, con 34; Ferrol, con 31; Ourense, con 28; Pontevedra, con 17; e Santiago, con 16.
A zona da Coruña é tamén a que concentra máis aulas pechadas, cinco aulas. Séguena Pontevedra con dúas e Vigo, Ourense e Santiago, cada unha cunha unidade inoperativa.
