O coronavirus mantén pechadas catro aulas na área sanitaria de Pontevedra e O Salnés, tras sumarse unha máis na última xornada, no CEIP de Seixo en Marín. Outras dúas das que xa estaban clausuradas tamén son de Marín, na escola infantil O Seixo e no IES Chan do Monte, e a outra en Cerdedo-Cotobade, no CEIP de Tenorio.
Os datos divulgados este venres pola Xunta revelan ese repunte a pesar de rexistrarse un lixeiro descenso no número de positivos na comunidade educativa de Pontevedra e O Salnés, que se sitúan en 103, seis menos que o xoves.
O centro afectado por máis casos é o CEIP de San Roque de Vilanova de Arousa, con 16, o que o converte no máis tocado en toda Galicia xunto a outro de Oleiros.
Polo demais, segue pechada a Escola Infantil Unitaria Cerdedo, o único centro clausurado na comunidade.
GALICIA. Non varía con respecto á xornada anterior o número de casos activos de covid-19 que afectan a centros educativos non universitarios e escolas infantís da comunidade, que se manteñen en 631, mentres que as aulas pechadas elévanse a 39 —cinco máis— e un centro continúa clausurado, a escola infantil unitaria de Cerdedo.
As infeccións activas soben nas áreas de Vigo (+2) e A Coruña (+6), ao tempo que baixan nas de Ferrol (-2) e Pontevedra (-6), mentres que se manteñen nas de Santiago, Lugo e Ourense.
Os casos activos en centros educativos de Galicia mantéñense en 631 e as aulas pechadas aumentan a 39
Deste xeito, a área de Vigo segue sendo a que concentra máis contaxios, 199, e ten 16 aulas pechadas —unha máis—. Mentres, a da Coruña sitúase con 178 casos activos e mantén nove aulas inoperativas.
Ségueas Pontevedra con 103 infeccións activas e catro aulas pechadas, ademais do único centro inoperativo actualmente en Galicia.
En canto á área de Santiago mantense con 78 positivos, mentres que as aulas pechadas aumentan a oito —tres máis—. A distancia, a de Ourense continúa con 35 casos activos e cunha aula clausurada pola incidencia do covid-19.
Con menos casos en centros educativos seguen as áreas de Lugo e Ferrol. A primeira mantense con 29 casos activos e por cuarta xornada consecutiva segue sen clases pechadas. E a segunda ten 9 casos activos e unha aula clausurada.
