Unha cume de alcaldes tratará de desbloquear o proxecto da vía verde de Pontevedra. O obxectivo é que a senda entre Portas e Vilagarcía ampliarse ata Ponte Sampaio e Arcade a través da antiga vía do ferrocarril, que quedou en desuso en 2013 tras a chegada do tren de alta velocidade.
O encontro entre políticos terá lugar no Concello de Vilagarcía. E a el asistirán o alcalde da localidade arousá, Alberto Varela (PSOE); o seu edil de Turismo, Álvaro Carou; o alcalde de Caldas de Reis, Juan Manuel Rey (PSOE); o alcalde de Barro, Xosé Fernández Abraldes (BNG); o tenente de alcalde de Portas, Afonso Vázquez (PP), e o tenente de alcalde de Pontevedra, Tino Fernández (PSOE), e o seu edil de Desenvolvemento Sostible, Iván Pontes.
A continuación do trazado é unha vella reividicación, que non saíu adiante polos obstáculos do Administrador de Infraestruturas Ferroviarias (Adif), que debe ceder a liña férrea, incluído a antiga ponte de ferro do tren sobre o río Verdugo, para levar a cabo este proxecto.
NO LÉREZ. En paralelo a esta actuación, o Concello de Pontevedra traballa na futura reforma do vello viaduto do ferrocarril en Monte Porreiro. A intención é converter en peonil esta instalación, que pasa por encima do Lérez e que quedou en desuso en 2014.
A Concellería de Desenvolvemento Sostible calcula que a obra contará cun orzamento de 150.000 euros, que se financiarán con cargo a fondos europeos Feder. A intención é que a intervención poida iniciarse este ano para abrir a ponte ao público.
